Despois da xornada de difusión levada a cabo por MeLiSA e Ainfogra, varios socios da Cooperativa Melisanto mostráronse interesados en incorporar a aplicación AinfoVac na xestión das súas explotacións.

O pasado xoves, 19 de abril, a Cooperativa Melisanto levou a cabo unha xornada de difusión da ferramenta informática AinfoVac, que xestiona tódolos procesos dunha explotación agrogandeira. Esta xornada contou coa colaboración da Asociación de Usuarios de Software Libre de Melide, e foi impartida por José Manuel Campos, director técnico de Ainfogra (Aula de Informática Agraria).

Un total de 15 socios e socias da Cooperativa puideron observar o funcionamento desta aplicación. AinfoVac xestiona toda a información que circula dentro dunha explotación, dende o control de gastos e ingresos, ata a xestión veterinaria do gando vacún, pasando pola conexión remota ao Control Leiteiro para envío e recepción de datos. Recentemente incorporouse un módulo que se pode instalar nun teléfono móbil con sistema Android, para a toma de datos ao lado das vacas, ou nas fincas que se estean traballando.

As persoas presentes na xornada mostráronse moi interesadas en incorporar esta aplicación na xestión das súas granxas, e formarán un grupo para poder asistir a un curso práctico, onde xa se explicará máis a fondo o uso desta ferramenta. Todas aquelas persoas interesadas en asistir a esta formación, e que non puideron asistir a esta xornada de presentación, poden poñerse en contacto coa Cooperativa Melisanto para integrarse dentro deste grupo.

AinfoVac, é unha aplicación distribuída baixo licenza libre (GNU/GPL), e pódese obter de forma gratuíta dende a páxina web ainfogra.com. O curso que se imparta dende a Cooperativa tamén terá carácter gratuíto para os socios.

O próximo 19 de abril, ás 12 da mañá, na Cooperativa Melisanto, terá lugar unha xornada de difusión para dar a coñecer a aplicación de xestión de explotacións agrogandeiras, AinfoVac.

A xornada será impartida por José Manuel Campos, director técnico de Ainfogra, e Rafael Rodríguez Gaioso, presidente de MeLiSA, e conta coa colaboración da Cooperativa Melisanto, ASETEM e o Concello de Melide.

O acto está dirixido a todas aquelas persoas interesadas en coñecer de primeira man as características desta aplicación informática, e especialmente aos propietarios de explotacións agrogandeiras.

AinfoVac é unha aplicación informática deseñada para a xestión dunha explotación gandeira en tódolos seus procesos productivos. Conta con módulos de facturación, xestión de compras e ventas, rexistro de animais, control xenético, control de cultivos, alimentación, vacinación, etc.

Esta aplicación distribúese baixo unha licenza libre que permite a súa utilización, copia e modificación, así como a distribución gratuita.

O próximo 29 de setembro, no CNTG en Santiago de Compostela, terá lugar unha xornada de traballo para dar a coñecer diferentes ferramentas informáticas, de interese para as entidades que ofrecen servizos a colectivos desfavorecidos.

A participación nas xornadas é gratuita, previa inscrición na web www.agasol.org/eventos.

Programa da xornada:

• 9:30-9:45 Presentación da xornada por parte da Secretaria Xeral de Modernización e Innovación Tecnolóxica da Xunta de Galicia, Dna. Mar Pereira Álvarez.
• 9:45-10:30 ¿Que é o Software Libre? Filosofía, solucións e ventaxas. Relator: Xavier Castaño (Igalia)
• 10:30-11:15 Tecnoloxías accesibles no centro educativo dixital. Relator: Carlos Rodríguez (Tegnix)
• 11:15-11:40 Pausa-café
• 11:40 -12:30 Tecnoloxías accesibles no fogar dixital. Teleasistencia en usuarios con diversidade funcional. Relator: Xurxo Cegarra (Wireless Galicia)
• 12:30 -13:30 Mesa redonda, presentación dunha nova plataforma de traballo orientada ao terceiro sector. Participarán empresas que contan con ferramentas dirixidas ao terceiro sector e orientadas á accesibilidade.

10. Probar antes de comprar

Ao igual que facemos cando queremos comprar uns zapatos, seguro que a moitos empresarios lles gustaría probar o seu software antes de compralo. Pois isto é posible nas aplicacións de software libre, e o poderemos facer dunha maneira completa, é dicir, sen limitacións no seu uso, como as que soen ter as versións demo do software privativo.

Se estamos a falar de sistemas operativos, temos a opción de usar unha versión en formato LiveCD, para ver como sería a súa execución nos nosos equipos informáticos. Existen moitas distribucións de GNU/Linux que contemplan este formato, por exemplo, Ubuntu.

--

Con este último artigo chegamos ao final desta serie de publicacións coas que pretendemos aclarar algunhas das dubidas que poidan ter os empresarios para atreverse a dar o paso de integrar software libre na súa empresa. Agardamos que haxan sido de utilidade, e recordade que estamos á vosa disposición para responder ás vosas  cuestións, e que proximamente faremos actividades a prol da difusión do software libre dentro da empresa.