9. Custo

Á hora de facer números do que nos custa a nosa aplicación privativa, debemos ter en conta tamén os gastos 'colaterais'. Polo simple feito de usar aplicacións non seguras, debemos ter o noso sistema protexido con medidas adicionais, é dicir, con antivirus, devasas, antimalware, etc., que non só teñen un custo económico, senón que ao final tamén temos que sumar as posibles perdas de tempo ante fallos no sistema. Tempo, durante o cal non poderemos desenvolver a nosa actividade laboral en condicións normais.

Cando por outro lado, dispoñemos da posibilidade de usar un software que nos ofrece as vantaxes como as que vimos en anteriores artigos, e que o seu modelo está baseado nos servizos, podemos facer facilmente unha comparativa xusta para ver que tipo de software é mais axeitado para a nosa empresa.

Teña en conta que o software privativo oculta moitos custos dos que ningún vendedor lle vai a falar deles. O software privativo cústalle moito máis á empresa do que o empresario probablemente saiba.

8. Opcións de soporte

O software libre permite a competencia en igualdade de condicións entre diferentes empresas de soporte. Cando a nosa empresa utiliza software libre non ten porque estar 'atada' a un único provedor de soporte técnico. Cousa, que por outro lado, non é así no mundo do software privativo. Onde non temos máis remedio que seguir as pautas que nos marca a 'única' empresa que nos pode ofrecer soporte técnico para a nosa aplicación.

Dado que os ingresos das empresa de soporte baixo código aberto, proveñen case de forma exclusiva deste tipo de actividade, podemos pensar que o seu traballo será moito mellor que o daquelas outras que basean o seu modelo na venta de licenzas.

Tamén é posible contar coa axuda das diferentes comunidades de usuarios que existen arredor das aplicacións libres. Por exemplo, as diferentes distribucións de GNU/Linux teñen unha excelente documentación, foros, listas de correo, blogues, wikis, etc.

Cando teñamos que decidir a compra dun determinado software para a nosa empresa, fagámonos a seguinte pregunta: ¿que ocorrería se a empresa subministradora desa aplicación desaparece?.

7. Auditar o código

Cando empregamos software privativo temos que facer un "acto de fe", e crer na palabra do fabricante ou do vendedor. Teremos que confiar 'cegamente' no que a empresa fabricante di que a aplicación fai, ou non fai. Non temos maneira de auditar o código desa aplicación.

Sen embargo, cando empregamos software libre, seremos capaces de comprobar pos nós mesmos a calidade do código fonte. Por exemplo, podemos comprobar que esa aplicación non está a enviar dados persoais cara internet, ou que non ten fallos de seguridade á hora de transmitir información, ou almacenar as contrasinais, etc.

Polo tanto, deixemos os "actos de fe" para outras facetas das nosas vidas, pero no que comprende á información que usamos a diario na nosa empresa, temos que ser capaces de confiar en que as nosas aplicacións son fiables, e non están a facer cousas 'raras' sen que nos demos conta.

6. Formatos abertos

Moitas empresas que deciden cambiar algunha das súas aplicacións, atópanse con que os dados que estiveron almacenando durante anos están gardados nun formato privativo que impide a súa exportación cara unha nova aplicación. De novo estamos diante dun caso de 'secuestro' do noso traballo por parte da empresa provedora de software. Ou en lugar de secuestro, imos chamarlle 'chantaxe'. "Non podes cambiar de aplicación porque non tes forma de levar os teus dados cara outra aplicación". Sabemos que soa moi mal, pero é a realidade diaria en moitas organizacións.

Debemos ser moi coidadosos á hora de elixir un software que nos permita sempre o acceso aberto á nosa información. Para elo debemos utilizar sempre formatos abertos. Que o noso traballo sexa almacenado de forma facilmente recuperable e modificable, aínda que sexa desde unha aplicación diferente á que estamos a utilizar actualmente.

Evitaremos a toda costa, quedar cautivos dun formato tan só por estar utilizando determinada aplicación. Incluso dentro da mesma aplicación, hai casos nos que un cambio de versión impide o acceso ao traballo feito en versións anteriores. Definitivamente ¿isto como se chama?.

Máis información na wiki de mancomún.