Asociación de Usuarios de Software Libre da Terra de Melide (MeLiSA)

ESTATUTOS

Titulo I. Da Asociación en Xeral

Artigo 1.

Coa denominación Asociación de Usuarios de Software Libre da Terra de Melide (MeLiSA), constitúese unha asociación sen ánimo de lucro que se rexirá polo presentes Estatutos, pola lei orgánica 1/2002, do 22 de marzo, reguladora do Dereito de Asociacións e pola lexislación existente en materia de Asociacións que lle sexa aplicable.

Artigo 2.

Esta Asociación constitúese por un tempo indefinido e só se disolverá por acordo da Asamblea Xeral Extraordinaria ou por calquera das causas previstas na lei.

Artigo 3.

Os fins principais da Asociación son:

1. Promocionar e divulgar o concepto de Software Libre e fomentar o seu uso.

2. Fomentar e apoiar os proxectos de Software Libre, especialmente aqueles desenrolados polos seus membros. Impulsar e respaldar as iniciativas de Software Libre.

3. Adaptación do Software Libre á lingua galega.

4. Promover o emprego de estándares abertos na sociedade da información e no ámbito tecnolóxico.

5. Formación das novas tecnoloxías no eido do Software Libre nos diferentes ámbitos (educativo, empresarial, administrativo, ...)

Artigo 4.

Para levar a cabo os seus fins, poderá a Asociación organizar as actividades seguintes:

1. Realización de conferencias, cursos, sesións de traballo, coloquios e calquera outra actividade lícita que sirva ós fins desta Asociación.

2. Colaboración e intercambios con proxectos doutros grupos similares a nivel nacional e internacional.

3. Organización de viaxes a conferencias, congresos e acontecementos relacionados co Software Libre.

4. Promocionar os proxectos de implantación de Software Libre en asociacións, sociedades, institucións e outras organizacións.

5. Desenvolvemento de actividades que axuden á introducción do galego no ámbito do Software Libre.

Como Asociación sen ánimo de lucro, os beneficios que se obteñan por calquera concepto destinaran se exclusivamente ó cumprimento destes fins, sen que se poidan repartir entre os asociados nin outras persoas físicas ou xurídicas con interese lucrativo.

Artigo 5.

O domicilio permanente e principal da Asociación radicará na localidade de Melide, na rúa Taboada Roca, nº 4, 1º Izq. CP. 15800.

    Poderánse utilizar outros locais asociativos noutras cidades, mediante acordo da Asamblea Xeral, que terá atribucións para cambiar, tanto o domicilio como os locais, dando conta do seu acordo ó Organismo encargado do Rexistro de Asociacións.

Artigo 6.

A Asociación en función dos seus fins e da ubicación do seu domicilio social, exercerá fundamentalmente as súas actividades no ámbito territorial da Comunidade Autónoma de Galicia.

Título II. Dos Socios

Artigo 7.

Poderán ser integrantes da Asociación todas aquelas persoas físicas, con plena capacidade de obrar, e as persoas xurídicas tralo acordo do órgano competente, que non teñan débedas pendentes coa asociación e que reúnan os seguintes requisitos:

1. Ter interese no desenvolvemento dos fins da Asociación.

2. Aboar, se fose o caso, unha cuota de socio.

Artigo 8.

Dentro da Asociación poden existir as seguintes clases de asociados:

1. Fundadores: aquelas persoas que subscribiron a acta fundacional.

2. Numerarios: aquelas persoas que ingresaron con posterioridade á subscrición da acta fundacional.

3. Protectores: aquelas persoas físicas ou xurídicas que a xuizo da Xunta Directiva contribúan significativamente á realización dos fins da Asociación, xa sexa colaborando desinteresadamente coa mesma dende os seus respectivos postos profesionais ou a través de aportacións económicas ou en especie. O seu nomeamento será acordado pola Xunta Directiva, debendo ser ratificado na primeira Asamblea Xeral que se celebre. Os socios protectores non terán dereito a voto, nin poderán acceder ós cargos directivos, pero a súa voz poderá ser oída na Asamblea Xeral.

Artigo 9.

Os socios numerarios e fundadores teñen os seguintes dereitos:

1. Tomar parte en calquera actividade que a Asociación organice en cumprimento dos seus fins.

2. Beneficiarse de todas as vantaxes que a Asociación poida proporcionar.

3. Facer suxestións ós membros da Xunta Directiva para mellorar o cumprimento dos fins da Asociación.

4. Participar nas Asambleas, con voz e voto, así como ser elector e/ou elixible para os cargos directivos.

5. Recibir información sobre o estado de contas, e ingresos e gastos da Asociación.

6. Aqueloutros que estiveren recollidos na lexislación vixente.

Artigo 10.

Son obrigacións de todos os socios:

1. Cumprir os presentes Estatutos e os acordos válidos das Asambleas e da Xunta Directiva.

2. Desempeñar as obrigas inherentes ó cargo que se ocupa.

3. Satisfacer as cotas que se establezan.

4. Asistir ás Asambleas Xerais.

5. Observar unha boa conducta individual e cívica.

6. Aqueloutros que estiveren recollidas na lexislación vixente.

Artigo 11.

Os acordos de admisión de asociados os tomará a Xunta Directiva, unha vez recibida a petición escrita da persoa que desexa ser admitida. No caso de menores de idade e persoas que actúen a través de representante, a solicitude deberá ser autorizada polo representante, pai ou titor do solicitante e acompañarase unha acreditación da identidade do solicitante.

Artigo 12.

A condición de asociado pérdese:

1. Por renuncia do interesado manifestada por escrito.

2. Polo falecemento do titular.

3. Pola falta de pagos das cuotas.

4. Pola realización de accións que perxudiquen gravemente os intereses da Asociación.

5. Por expediente disciplinario.

Artigo 13.

A expulsión de asociados será acordada pola Xunta Directiva, previa audiencia do interesado/a. O acordo de expulsión deberá ser ratificado pola Asamblea Xeral Extraordinaria e contra a súa resolución poderáse recurrir ante a xurisdicción ordinaria.

Cando a baixa se produza por vontade dun asociado, éste deberá realizar unha petición escrita e procederá ó pago de tódalas cuotas que teña pendentes.

Título III. Órganos de goberno e representación

Capítulo I. Réxime Xeral

Artigo 14.

A Asociación rexerase segundo os presentes estatutos, sempre que os seus contidos non se opoñan ás leis nin contradigan os principios contidos na Lei Orgánica 1/2002 e o seu desenvolvemento regulamentario.

Artigo 15.

O goberno e a representación da Asociación están a cargo dos seguintes órganos:

1. A Asamblea Xeral de socios, como máximo órgano de goberno da Asociación.

2. A Xunta Directiva, como órgano colexiado en quen a Asamblea delega o goberno permanente da Asociación.

3. O presidente, o vicepresidente, o secretario e o tesoureiro, como órganos unipersonais e con funcións de goberno e de representación determinadas polos estatutos.

Capítulo II. Da Asamblea Xeral

Artigo 16.

A Asamblea Xeral é o órgano de expresión da vontade da Asociación, estará formada por todos os asociados e tomará os seus acordos polo principio maioritario ou de democracia interna. O Presidente e o Secretario da Asamblea serán os mesmos que os da Xunta Directiva.

Artigo 17.

A Asamblea Xeral reunirase con carácter ordinario como mínimo unha vez ó ano, e con carácter extraordinario cantas veces o acordar a Xunta Directiva, o considerar o Presidente ou o soliciten o 20% dos socios. Neste último caso, realizaráse por medio de escrito dirixido ao Presidene, autorizado coas sinaturas dos solicitantes, en que se expoña o motivo da convocatoria e a orde do día.

Artigo 18.

A Asamblea Xeral Ordinaria reunirase necesariamente dentro dos tres meses seguintes do cerramento do exercicio. Tanto a Asamblea Ordinaria como a Extraordinaria serán convocadas con 15 días de antelación polo Presidente/a da Xunta Directiva, enviándose a notificación aos asociados mediante o medio aprobado pola asamblea.

Na convocatoria han de aparecer o lugar, data e hora da xuntanza, así como a orde do día con expresión concreta dos temas a tratar e os anexos que foren necesarios. Tamén ha de sinalarse a hora da segunda convocatoria, que, como mínimo, terá que ser media hora despois da primeira convocatoria.

Artigo 19.

Para que as Asambleas poidan tomar acordos, estarán constituídas polos asociados asistentes, sempre que concorra un terzo do total dos asociados con dereito a voto na primeira convocatoria ou, pasado o prazo estipulado, con calquera número de asociados con dereito a voto en segunda convocatoria.

Artigo 20.

Os socios poderán outorgar a súa representación, a efectos de asistir ás Asambleas Xerais, en calquera outro socio. Tal representación outorgaráse por escrito, e deberá obrar en poder do Secretario da Asamblea polo menos media hora antes de se celebrar a sesión.

Artigo 21.

Serán competencias da Asamblea Xeral Ordinaria:

1. Examinar e aprobar as contas e o balance do exercicio.

2. Decidir sobre a aplicación concreta dos fondos dispoñibles.

3. Aprobar os orzamentos de ingresos e gastos para cada exercicio.

4. Aprobar o Regulamento de Réxime Interno da Asociación.

5. Fixar as cotas ordinarias ou extraordinarias.

Artigo 22.

Serán competencias da Asamblea Xeral Extraordinaria:

1. Elección dos membros da Xunta Directiva.

2. Federación con outras asociacións.

3. Modificar os estatutos da Asociación.

4. Acordar a disolución da Asociación.

5. Ratificar a expulsión de socios proposta pola Xunta Directiva.

6. Autorizar o alleamento, gravame ou hipoteca dos bens sociais.

7. Solicitar a declaración de asociación de utilidade pública.

8. Aquelas que, sendo competencia da Asamblea Ordinaria, por razóns de urxencia ou necesidade non poidan esperar á súa convocatoria sen grave prexuízo para a Asociación.

9. Todas as non conferidas expresamente á Asamblea Xeral Ordinaria ou á Xunta Directiva.

Artigo 23.

Os acordos tomaránse por maioría simple das persoas presentes ou representadas cando os votos afirmativos superen aos negativos, non sendo computables os votos en branco nin as abstencións. Será preciso maioría cualificada das persoas presentes ou representadas, que resultará cando os votos afirmativos superaren a metade destas, para os apartados comprendidos entre o 2) e 7) do artigo anterior, e maioría de dous terzos cando se trataren decisións afectadas polo punto 8) do artigo anterior. A continuación, levaránse os acordos ao libro de Actas, que asinará o Presidente e o Secretario da Asamblea. A acta deberá ser lida na seguinte sesión celebrada pola Asamblea Xeral e aprobada por maioría simple.

Artigo 24.

Os acordos que vaian en contra destes Estatutos ou dos fins da Asociación poderán ser recorridos en reposición perante a Asamblea Xeral. A partir da resolución do recurso de reposición, ficará aberta a vía para recorrer perante a xurisdición ordinaria.

Capítulo III. Da Xunta Directiva

Artigo 25.

A Asociación será xestionada e representada por unha Xunta Directiva formada polos cargos de Presidente, Vicepresidente, Secretario, Tesoureiro e un Vogal.

Todas as persoas que compoñen a xunta directiva deberán ser asociados, maiores de idade e exerceren o cargo de forma gratuíta. Os cargos serán designados e renovados pola Asamblea Xeral Extraordinaria e o seu mandato terá unha duración de 2 anos, podendo ser reelexidos ao final do seu mandato.

O presidente poderá designar un número ilimitado de vogais extraordinarios co acordo da xunta directiva electa. Estes vogais extraordinarios terán voz, pero non voto, na xunta directiva. Estes vogais participarán por períodos de 1 ano de duración sendo renovables.

Artigo 26.

Os cargos da Xunta Directiva poderán causar baixa por renuncia voluntaria comunicada por escrito á Xunta Directiva, por incumprimento das obrigas que tiveren encomendadas e/ou por expiración do mandato. Neste último caso, continuarán nos seus cargos ata o momento en que se produza a aceptación de quen os substitúan.

Artigo 27.

As vacantes que se puideren producir na Xunta Directiva cubriranse provisionalmente por designación da mesma ata que a Asamblea Xeral elixa os novos membros ou confirme nos seus postos os designados nun prazo máximo de 30 días.

Artigo 28.

A Xunta Directiva reuniráse con carácter ordinario unha vez cada trimestre e con carácter extraordinario cantas veces o determinar o Presidente/a ou a petición de tres dos seus membros.

A convocatoria realizaráse como mínimo con dous días de antelación mediante correo electrónico no que se recollerá a orde do día. No caso de ausencia inxustificada de calquera membro da Xunta Directiva por tres veces consecutivas, procederase á súa destitución. A Xunta Directiva quedará constituida cando asista a metade máis un dos seus membros con dereito a voto, e para que os seus acordos sexan válidos deberán ser tomados por maioría de votos. No caso de empate, o voto do Presidente/a será de calidade.

Artigo 29.

As facultades da Xunta Directiva estenderánse, con carácter xeral, a todos os actos propios das finalidades da Asociación, sempre que non requiran, segundo estes Estatutos, autorización expresa da Asamblea Xeral. En particular, son facultades da Xunta Directiva:

1. Dirixir actividades sociais e levar a xestión económica e administrativa da Asociación, acordando realizar os oportunos contratos e actos.

2. Convocar as Asambleas Xerais e executar os acordos nela acadados.

3. Formular e someter á aprobación da Asamblea Xeral o Plano de actuación proposto pola Xunta Directiva, así como a Memoria de xestión correspondente.

4. Formular e someter á aprobación da Asamblea Xeral o Orzamento do exercicio, así como os Balances e as Contas anuais do exercicio pechado.

5. Resolver sobre a admisión de novos asociados.

6. Crear Comisións de traballo co fin de delegar nelas a preparación de determinados actos ou actividades ou recadar das mesmas as informacións necesarias. A cargo destas Comisións poderase designar un membro da Xunta Directiva.

7. Nomear delegados para determinadas actividades da Asociación.

8. Interpretar os Estatutos e o Regulamento de Réxime Interno e velar polo seu cumprimento.

9. Ditar normas de funcionamento non contempladas no Regulamento de Réxime Interno.

Capítulo IV. Órganos unipersonais

Artigo 30.

O/A Presidente/a terá as seguintes atribucións:

1. Ostentar a dirección da Asociación, velando polo cumprimento dos seus fins.

2. Representar legalmente a Asociación ante toda clase de organismos públicos ou privados.

3. Convocar, presidir e levantar as sesións da Asamblea Xeral e da Xunta Directiva, así como dirixir as deliberacións que nelas se produciren.

4. Ordenar pagos e autorizar coa súa sinatura os documentos, actas, certificacións e correspondencia.

5. Adoptar calquera medida urxente que a boa marcha da Asociación aconselle ou no desenvolvemento das súas actividades resulte necesaria ou conveniente, sen prexuízo de dar conta posteriormente á Xunta Directiva.

Artigo 31.

O/A Vicepresidente/a asumirá as funcións que nel/a delegue o/a Presidente/a, substituíndoo en caso de vacante, ausencia ou enfermidade.

Artigo 32.

O/A Secretario/a terá as seguintes atribucións:

1. Ostentar a dirección dos traballos administrativos da Asociación.

2. Custodiar e levar os libros de actas e de rexistro de socios/as, documentos e selos da Asociación.

3. Estender as convocatorias e as actas das reunións, ademais de expedir certificacións das mesmas co visto e prace do Presidente/a.

4. Comunicar sobre a designación de Xuntas Directivas e demais acordos sociais inscribibles nos Rexistros correspondentes, así como a presentación das contas anuais e o cumprimento das obrigacións documentais nos termos que legalmente corresponden.

Artigo 33.

O/A Tesoureiro/a terá as seguintes atribucións:

1. Ostentar a dirección dos traballos de xestión económica da Asociación.

2. Custodiar e levar os libros de contabilidade e os inventarios, así como todos os documentos económicos necesarios para a elaboración das contas e balances.

3. Preparar os Orzamentos, as Contas anuais e os Balances para a súa presentación diante da Xunta Directiva e da Asamblea Xeral.

4. Recadar e custodiar os fondos pertencentes á Asociación.

5. Dar cumprimento ás ordes de pago que expida o/a Presidente/a.

Artigo 34.

Os Vogais terán as obrigas propias do seu cargo como membros da Xunta Directiva, así como as que se deriven das delegacións ou comisións de traballo que a propia Xunta Directiva lles encomendar. O vogal máis novo presente substituirá ó Secretario en caso de vacante, ausencia ou enfermidade.

Título IV. Réxime económico

Artigo 35.

A Asociación no momento de constitución carece de fondo social. En adiante coincide co recollido nas contas aprobadas anualmente.

Artigo 36.

O exercicio asociativo e económico será anual e o seu cerramento terá lugar o 31 de decembro de cada ano.

Artigo 37.

O Orzamento da Asociación será anual, tendo que ser aprobado como moi tarde na primeiro Asemblea Xeral Ordinaria do exercicio no que estará en vigor. Asemade, a liquidación do Orzamento terá que ser presentada na Asamblea Xeral Ordinaria inmediatamente posterior ao remate do exercicio.

Artigo 38.

Anualmente e con referencia ao último día do exercicio económico de cada ano, practicarase o inventario e balance de situación, que se formalizará nunha memoria e será posta a disposición dos socios durante un prazo non inferior a quince días ao sinalado para a celebración da Asamblea Xeral Ordinaria, que deberá aprobalo ou censuralo.

Artigo 39.

Os recursos económicos previstos para o desenvolvemento dos fins e actividades da Asociación serán os seguintes:

1. As cotas ordinarias dos asociados, que en ningún caso serán reintegrables. Estas serán fixadas pola Asamblea Xeral Ordinaria.

2. As cotas extraordinarias que propoña a Xunta Directva e sexan aprobadas pola Asamblea.

3. As doazóns ou subvencións que poidan conceder órganos públicos, entidades privadas ou particulares.

4. Os ingresos que se poidan recibir polo desenvolvemento das actividades da asociación.

5. As achegas voluntarias, que se considerarán como préstamos sen xuros, reintegrables nos termos que se pacten.

6. Os préstamos ou créditos necesarios, que deberán estar asinados polo presidente e acordados pola Xunta Directiva.

7. Calquera outro recurso lícito.

Artigo 40.

Para a disposición de fondos das entidades bancarias onde a Asociación teña depositados os mesmos, deberán ter recoñecidas as sinaturas, como mínimo: o Presidente e o Tesoureiro. A Xunta Directiva poderán engadir outras sinaturas recoñecidas, sempre de membros da propia Xunta. A Xunta Directiva poderá decidir se o uso das contas é mancomunado ou indistinto.

Artigo 41.

A disposición dos ben patrimoniais que se aproben regulamentariamente ha de ser aprobada pola Asamblea Xeral.

Título V.Modificación dos estatutos

Artigo 42.

Os presentes Estatutos poderán ser modificados a proposta da Xunta Directiva ou un cuarto dos Asociados. A convocatoria da Asamblea Xeral Extraordinaria terá a modificación dos Estatutos como único punto da orde do día e estará acompañada do texto coas modificacións propostas, abríndose un prazo de 10 días para que calquera socio poida dirixir á Xunta Directiva as propostas e emendas que estimar oportunas. Éstas complementarán a documentación da citada Asemblea e serán postas a disposición cunha antelación mínima de 3 días á realización da mesma.

A aprobación da modificación dos Estatutos acordarase pola maioría cualificada das persoas presentes ou representadas.

Título VI Disolución da Asociación e liquidación do patrimonio

Artigo 43.

A Asociación disolverase polas seguintes causas:

1. Pola vontade dos asociados acordada pola maioría cualificada das persoas presentes ou

representadas.

2. Por outras causas determinadas legalmente.

3. Por sentenza xudicial.

Artigo 44.

Acordada a disolución, a Asamblea Xeral Extraordinaria designará dous asociados liquidadores, que, xunto ao Presidente e Tesoureiro, procederán a efectuar a liquidación dos bens, pagando débedas, cobrando créditos e fixando o haber líquido resultante. O haber líquido resultante, unha vez efectuada a liquidación, doarase a outra entidade de carácter non lucrativo, inscrita na Provincia de A Coruña e que tiver os mesmos ou similares fins aos desta Asociación. O xustificante da doazón será presentado no Rexistro de Asociacións correspondente para proceder á inscrición da disolución da Asociación.